كلمات الشاعر / عمر علي عبد المجيد
وأنا في الطريق لي بكره عز شمس النهار،
لاقيتو عشقك مرتين
الأولى كنت معبأ فل
سكران سكر مليان غبن
نُقّاط غبينتي من الزعل
ما بلحق الواطة وبفوت،
والثانية كنت حلمت بيك
بس للأسف
بعد الظلام شال حقو فيك
غوبشته ما عرفتك منو
يا بنيه عمرك كم سنة
وعمر المحكات في جواي
كمين من الوجع البكر،
وأشعاري تجري وتستريح
لأخلت الخوف والجفاف
لا الطين ونقاط البيوت
والكشة والفول والنضال
وده كلو ما أظن تعرفي
ما الدنيا عندها جنبتين
يا أما ليك
أو تركبك شقيش تقبل
بالشلاليت والحكومات الحوص؛
ينجض عقاب حلتنا
من داب حقنا
ويتمطقن دول الجوار
وبيارق البوليس شهود
كل ما كتر عسس البلد
كل ما انكتب تاريخنا
زي جنى سبعة
ناقص كم شهر
والعلة في هذا الزمن
وشك على الناس بنعرض
حسب الشروط الفي الضهر،
وأنا عندي ليك حلاة مهر
مليون درب بيودوا ليك
وكم من ملايين مدرجين
في الانتظار لي لحظتك!
وأنا أصلي قواد قالوا
في حب حضرتك
يا أصفي، مليون ميل غصب
ديل قالوا ما بعرف خلاف
انقل وأجيب ليك الرجال
يا بنيه، مابيولع زقاقات عتمتك
كم عود وكم لمبة نيون
خليني من عشق العيال
الزيو زي سلخ النعاج
بتكامل العريانة من صوفها
ويمطق ريقو قبال يوصلا،
والقصة أكبر من قوامك
حبذا بعد الطبنجات الموجهة
في اتجاه راجل العدو؛
بس غايتو الله كريم عليك
والنوم مفيد في الحالة دي
وأنا لاببيت ولابدخل البيت من غفاه
ولابستريح في عتمة الشوق
المتركش باتجاه الهاوية
ولابرجا لحظة أجننك
ولابي طريقك يوم بجن
بس عايني للناس
البتخسر عفتها بلقمة جهال
أو كيس لبن أو حق خضار
او حق رغيف أو حق ايجار
لي بيت بيلم متحررات
باسم الوطن واللقمة والدين الحنيف
هذي الكتوف القايمة
من ظهر الظروف
ماعارفة غير تمرق
صباحها وتنمضق
وتعود مع شمس المقارب
شارقها الهم والوجع
عايني الكلاب والناس
وشوفي براك يات عضة
بتكون أرحم عليك، ويات لحم
شمس الصباح مليان بالخوف والفقر
والرجفة من عدم الفطور
والبيت ينقنق في الديون
ممنوع عيا ومستشفى في هذا الزمن
والموز بلا اول شهر
والمنقة فوق البيت حرام
أرخص من البنباع مغلف
في الدكاكين لحمنا
الكسوة فوق العيد حرام
واللحمة من دون شوفة الدكتور
ابان العلة من وجعك حرام،
وأنا ذاتي أمي لامن تجوط
بتقول على أنا ود حرام
وبعد ده كلو عليك أبوك
بي وين يشيلني معاك سرير،
بي وين ألاقي كلام سمح
ضد الوطن أهديهو ليك،
والسادة حافظة الدقون
تدشه دين تعرق وطن
والباقي مني عقاب دموع
يادوب أفوت بيها الشغل
وابكيك أمام صرافنا والماهية
مارقة وعلة الغطا في البنات
يانتمو دين يا يمرقن فوق الزلط
طبقي البسوي الكسرة في
بقدر طبقكم يطبق الطبقوا القروش
سووها في ماليزيا مال
ماقلنا بيننا الاتصال
والالفة والشوق والنضال،
وجع الكتب طعنة حروف
وجع المحطات انتظار
وجع الغباين دمعة آخر الليل تكب
وتنتف الشوق مني ليك
حد ما يحين آخر الشهر
وأشعر كأني في بيت ايجار،
وأنا في وطن ظناً معاي
ومؤجر أشواقي وهتافي ومحنتي
لي منبر الكسب الرخيص
والبيني وبينك وبين غطاك
والتحتو وعدك بالملك
وأنا ما بخلته بصوتي ليك
ولا انتخبتك مارقة للربا والتلاف
وأنا جرحك البنتح جواك
لاببرا يمرق مكسي بي شاش الظروف
لابجدعك للساسة في الليل
شان يصاغ منك بيان ...
ومعارضة تكون في سرير الدولة والدين والنضال
ماظني الهاكم تكاثر؛
طالما الإجهاض طريق
للثورة والخير والاجنة القاربت خط التماس
وانا معترف انو الكتاب
مفتوح عليك ومعربد اطمئنانك السائل علي
يا روعة، في الروح والجسد
وأنا نفسي أضحك من جواي
وأفرح فرح ليلة عروس
بتكاوي في صاحباتها بالغناء والرقيص
وانتف وجايعك من جواك
سلت رويحة الغازي في البلد النضيف
في يومها داك، أنا بستريح
وأرقد على صدرك عريس
مرفوعة عنو مهامو ديك
وأسرح وأنوم حد ما تحوق
الشهقة في الصدر الوسيع
غناي وكل المعجبين
بي صوتي هم أصلاً طرش
شن فايدة الفرح إن بقى
الجلابي مابعرف يحس
شن فايدة الناي دون بهم،
تبراك كان الناس مع داؤود أبت
شن فايدة الغطاء ان بقي
القطوهو مارق لاختبار كل الانوف
والعصمة في ايد الزلط
شن فايدة الواقفين هناك
كان العلوج قاعدين هنا
شن فايدتك! لو فيك نفس
واخترتي خناقك براك
شن فايدتك لو فيك ناس
رويان لسانهم بالكضب
وبعطشوا الناس بالهتاف
مالين دروبك بالصور
من شامبيون لاعند حبيبنا المستشار
الما أظنوا بيستشار
يا الخاتة، كتالك حداك
كم مرة حلفتك عشان
ما تخلي بالك من قفاك
وانا يبدو من كثر النبيح
يا رايعة، ماداير معاك
مع انو في جواي هتاف
من شوق، بقول دايرك معاي
وأنا لابدور حقك غصب
لاحقي ليك بديهو ساي
هي أمرقي خليك عاقلة
ما بحمل دفاك
انا زول بكاتل عز شتاء الاخلاق
وعريان ما بشوف السترة
إلا في ضحكتك
أو ربما لسعة غناك
لي الليلة ماقنعان من العشق الفضل
بس برضو ماضامن لقاك
خليك زي وجع الضرس
لايبرا لابنقح دوام
وانا في شتاي عارف أقيف
لو حاسة في الصيف بالبرد
في ظني يبقى الجو برئ بس انت دي الفيك مشكلة
وراجيك جنس حر في الشتاء
والبيني بينك حفرة واسعة
مكابت الغش في وشيها
ولابجيك لاتعدي لي
خليك مكانك في الغباش
وأنا راح أكون دائماً هناك
مع المساكين والدراش
برقص كما شمس الظهر
مليان مستف بالدعاش،
قنعان من الصدر البنذ
من تحتو دابي وصوت وشاش
بس برضوا كان حان الرحيل
أديني ريق أتوقّا بي
وامرق على العتبة ام حجار
واحضن بكاي وانشقه بي،
وانا كنت قاعد في المسافة البيني مابين العشق
مرتاح بغني وأفلي في الفارغه أم قدود
جيتيني مارقة من العصب
مخلوعة زي يوم البرود،
لايوم سألتك ماشة وين
ولاحشتو من بيتك وقود
يا سكة الوجع البسوق
طلقته كل ألكان براك
عبيتو عشقك في العروق
روحي المطنبجة باشتهاك
أديتها ليك واريت تحوق
وبعد ده كلو تقولي لي
أنا ربما كايسه المروق
طلقانه من عصبي المجرتق ريده كايس ضمتك
طلقانه من شهقة عريس
علق غرام في زمتك؛
وانا ريثما تنفكه عقدة صدرك
المارق على الناس
زي دعا المظلومة في العيد الكبير
بضحك وادون بكره
في ذاكرة تواريخك فساتين كايسة للأجساد عشاء
خليني فاكر من لقاك الوعد بس لحظاتنا اثنين في جسد
بس بي فرد شهقة بنعيش
وأنا لسه فاكر يوم جريت
فرشته شحتاف روحي فيك
ومليتو جوه عروقي دم
مرق العشق فرق المسام
بسألني قال: انا وانت كم
هذي البلاد باشت
صباح يوم دخلتها
وعريسها مكشوف حال
يطالب بي حقوقو وبي خسارتو لحدي دخلتو والعشا
وحبيبي داك سلام سلام
تحلف تقول سيدي الحسن
اذيكم كيفنكم قيلتو كيف
وان شاء الله خير
ياخ صلي على النبي وأهدا بس
مرجوعة مالحظة زعل
والمشكلة الكبرى التقيظ انو الكلام الجاب يمين
وحلف طلاق واذيكم كان باختصار عن البلد
ويسعد صباحك يا بلد
يسعد صباح القشة في ضهر البعير
وسعد صباح شعرة معاوية
السادة باب فراني في حلة جياع ومقطعين،
يسعد صباح كل البحس جواه بي وجع البلد
يسعد صباح كل البقول يوماتي من وجعك على مالايجوز!
أحد أحد،
وطناً بيكتح بالبواليس والبيانات
البتلمع في حدود المستطيل الابيض الاسمو الورق
وطناًبيجر سكينو فيك
ويحلف عليك كان تبكي من وجع الجرح
كل الحكومات تنبتر
حد ما ينوسر جرحك الواقف على انك مواطن مستقيم
هذي الحبوب عند اللزوم،
واحدة بتختها للفقر
واحدة لعلاج القيمة شان تصبح حرامي وابن كلب،
كل القيم صبحت جروح
كان مابريت من وجعتها
ما بتاكل اللقمة التنذ
لابتلبس الهدم النضيف
في مامضى من عمرنا
أدونا في حصص الحساب
الرفق بالحيوان سؤال
في حصة الدين الزمان
كنا بنفت الساندوتش مع بعض دون حاجة لي حصة عصر
أصلو الحساب هو الدين ودينك هو الحساب
والدين اذا مرق الزلط
استني من كل البيوت أكبر مساحة من الغلط
وطناً على الانسان بيدوس
وبعلمك فوق الدروس
ماتحبس الهرة أم كريعات أربعة
ياللضجيج والزوبعة.
يا أعدل الحكام هناك
يومين ثلاثة تعال هنا
بتعرف جهنم سرتها المدفونة وين
كل المدارس في البيوت
والمدرسة العند الحكومة بلا الجبايات والقلع ماعندها
في الجامعة تعرف كيف تخون
وتباصي في كل المواد المادة بي مية جنيه
وايدك تختها في ورك أجعص بنية
وبعدها تخش امتحانات الدراسات والعقيدة
وبرضو بتباصي وتمر
وطناً بيقول طالبنا دين
لامن نقول طلابنو دين
واحد يجيبك من الشرق
ويحلف وحات سيدي الحسن
واحد يجيك من دنقلا
ويتحفنا بي رب الامام المهدي في هذا الوطن
واحد يقول على الطلاق
وده كلو دين
وطناً على نيل بامتداد أقصى حدود الارض فيك
والناس تنبذ في الحمار
وتجيهم الموية أم براميل
واصلا أيضاً بالحمار
وطناً بيحلف باليمين
في ظرفنا الواطي وكئيب،
يدي المحلية النصيب
نمرق كويسات الوسخ ندي المحلية النصيب
عربيتك الفوق الزلط تدي المحلية النصيب
بيتكم عوايدو بتمرقها وتدي المحلية النصيب
في الكورة والاستاد هناك تدي المحلية النصيب
أولادك الفي المدرسة بيدو المحلية المصيب
ااااه يا وطن انا من كتر ما بعشقك صدقني ماقادر أقيف
أصلو المحبة الفي اتجاهك غالباً
ما تعني مجموعة علل
أول مداخلها هوالفقر والذلة والجوع والعطالة
وكل ماتحتاجو دولة عز فتية من طعام اللافتات
أعطوا الأجير حقه قبال يجف حلقوا النشف وفقد سوائل،
هل تجوز جهته التفاتة؟
يا بلاد الدين، وطاقية الحدود
عاد رحتي وين يا السمحة يا ام راجلاً، فسل
هو المابيدفع حق ايجار
بي وين بيكرم للضيوف
حسن البطل عوض البطل حمد البطل
مرقوا الضهاري يكوسوا ليك
لي الليلة يابت الحلال، لاجيتي لا الكايسك وصل
وطن الجدود هذا الذي انفتحت عليه كل القدود
وطنك وريقة امتحان مابيمشي في الواقع شبر
تنجح اذا صحا النكاح مابين ورقتك والحبر
فكرة جلوس في المدرسة بتلقاك في الواقع قيام
فكرة سكوت تصبح من الفارغ كلام
أنا ياوطن،
احترت في تقديري ليك
امكن تكون وطنيتي ماقدر المقام
برضو احتمال
لاقابلو لا بستبعدو أصلو الفتاوي المراقة من الجوع بتشبه حتتا
والصورة لامن تبقى جواك هي الوطن صدقني،
مابتحتاج غطا وطنك فضيحتك وسترتك
لامن منابر النقة والقول الكثير
تحتاج معاك نقطة نظام
وطنك شموع الفكرة في حضرة خفافيش الظلام
ما هو البيضرب مؤمنين بي قدرتك في كل يوم تحت الحزام
وطنك صباح اللقمة في بطن العيال
نور الوظيفة المارقة بيك يوماتي من جحر السؤال
عذراً أمير المؤمنين الجوع سؤال مابيفرز اللقمة الحرام من الحلال! عذراً أمير المؤمنين كان خطبة الجمعة المضت ماحضرتها
انا كنت مفتول ناقص الرقم البيفك الشفرة مابيني ورقاد ود الاحد
انا كنت ميت غصب عن كل المطاعم بانتظام
والضرب في الميت حرام،
ما الجوع بيكتل أحلى لحظات العلاقات السليمة
الجوع بعنون فكرة الشوق للرغيف
كطموح مقمس بالهزيمة،
الجوع عزيمة
باتجاه أقصى انتماءات النفس
في جهدها الاقصاهوا كان فكرة وليمة،
الجوع بساوي أي انسان كرموا الله بي عقل بي دين وأخلاق بالبهيمة واااه وكم اااه يا وطن؛
كل ما أدق في رقمك المشغول بحس
بالامتهان أصعب شعور انك تكون شايل معاك كل الاجابات
التشكل قمتك وتجيب صفر في الامتحان
حلاق بينمص في الرموش
والأولى منها ما اتحلق ااه يا وطن،
معنى التعادل فيهو بيكون واحد صفر اااه يا وطن،
كل الخطوط مشغولة بالوالي وأمير المؤمنين
والعاملين عليها في فقه الزكاة وترجو اتصالك لاحقاً
هذا الوطن فالح يحاسبك في حقوقو حساب نكير
لازم عليك انك تحبو وتلتزم
وان قلت لايفتح عليك وطن الجدود كتره مواد
شبهة وتلبس وانتحال
وحتبقى في الآخر عميل
وطن الصباحات والجرايد واليفط والاغنيات
كل الشتر، في الساحة بيرقصوا بانتظام خارج خطوط الانتظام
دون حاجة حتى لاغنية
في الساحة اوفنان يقول
حزب الفضيلة ملاسنات
حزب العدالة جاء بانقلاب
حزب الصباح مجاني آخر الليل بجيك بس في الحلم.
وطن الجدود نفديك بالأرواح نجود
بس، انت وين
ورينا سكة تودي ليك!
في دنيا آخرها كوم تراب،
بلا خجلة في بنك الحقيقة تسوي للكضاب حساب
أهو غايتو بخجل مرة منك
ومرتين بخجل عليك
عاقلة وطويلة ومرهفة
وصلاية وأذانك جنب
للجمعة أذّن ستة مرات
منهن جوز عارفن
والباقي من باب الحماس
عريان وشغلتو بيع دبابيس الحجاب
ما الموية للشرقان هي حالة من الترف
والبيعرف السوس مابيخلي العود سند مستقبلو
والغنوه في النفس البتعطس كل يوم
تريانة بتفرِّغ جراب الامنيات
يا بنيّة شن جابرك على رسمة
خريطة بلا هوية ولا اتجاه
ولا حتى لون
خليك في فهم البنات
الفكرة في الآخر عريس
يدعم صفوف المحبطين
بي ود طهور، وبنيّة
يختلف الأئمة الاربعة على وضعها
فرعوني أو سنة ولايخلوها ساي
أو بحثها في مبدأ تطور فكرة
من مؤودة
لي أقصى انتصار
خلاها في الواقع تعيش
أو ابن حنبل في الوضوء
وأبوحنيفة وكيف تجوز المتعة في فهم الزواج
والواقع البيضحك عليك
اتجاوز اسئلتك زمان
وبقى في زواج المتعة بينات الرجال
في الظار واثروا على البنية العرست بدل الخميس يوم الأحد
في فقرك الخلا البنات
قسمن عروضن كفتين
الفوق عشان خاطر الحبيب
اما التحت بيستنى لي صاحب النصيب
واستاذك الواقف يسف من طالبو جو المدرسة
والجامع الطول السنة بيصرخ ويقول بلا خجلة
يوماتي ونهار يا أيها.......... المؤمنون
يا حليل معاني المؤمنين
مؤمن ببيت جيعان
وجارو بسوي
عيد الثورة
عيد ميلادو
وعيد الأم
وعيد الحب
وبابنويل وماليزيا وجزر باهاما
سور الصين
وانت الأولى بالمعروف
تكون بايت القوى وعدمان
تكضبوا في المنابر يومي
لابتكلّو لابتملّوا لابتحسّو لابتغيّرو الموجود
ولابنبلّه ريق الناس
ولابيتحقق الحلم الاساساً في الخلق مشروع
ونحن في واقع
اذا الواحد غلط مره وسها وقال ليك: صباح الخير
تشك انو الشمس طلعت
وأصلاً انت بتكون شاكي في فكرة صباح الخير
صباح الخير.. صباح الخير.. على هذا الزعيم المافي زيو اتنين
وطن مسكين.. يلاقي حقوقو يوم الدين
مع السامعين .. نقول آمييييين
