الباب البجيب الريح
أزيلو أرحام هؤلاء الفتيات
د. عادل الصادق المكي
دعوة جادة.... ودايرة تفهم... وفهم... دايرة ناس عاقلين... أقصد بالفتيات أقصد بهنَّ الفتيات المعاقات ذهنياً... سوى كانت إعاقة نتيجة لخلل وراثي...أو إعاقة مكتسبة زي الجنون....قبل أيام كتبت عن المعاقة ذهنياً والاتعرضت لاغتصاب.. وحملت وولدت... وعند التقصي لقيت أنها دي ما الحالة الوحيدة... غيرها كتيرات مسكينات اتعرضن للاغتصاب وحملن وولدن..... أذكر في التمانينات.... شفت مرا في أواخر العشرينات من عمرها... مسكينة مجنونة شايلة جرو وترضع فيهو في شارع الله... وأي زول يحاول يشيلو منها تنشبك فيهو وتعضعضو وتزعمطو... سألت أحدهم قال لي المرا دي مرضت بالجن دا ليها زمن ...على قبال كم شهر حملت وهي في جنها دا...ولدت ولد..أهلها شالو منها الجنا وغتسو حجرو..أهلها خايفين من الفضيحة والوضع الاجتماعي حتى لو كانت مجنونة.... أها قامت لقت الجرو دا.. وافتكرتو ولدها وتراها شايلاهو وحايمة بيهو وترضع.... والجريو مسيكين يعوّص... وهي تحشر في حلمة الشطر في الخشم... والبيجي بيجنبو واللا يحاول يهبشو ساكت الله قال بي قولو... لكن اعتقد بعد فترة أهلها قدرو يخارجو الجرو منها...وبرضو حكو لي عن واحدة مولودة معاقة ذهنياً... وكبرت وبلغت وحملت من واحد .... دي أهلها كانو واقعين وخلو الجنا ليها.... وما حاولو يغتسو حجرو... زي الباقين.....لكن كانت بتعلب بيهو زيو وزيو اللعبة (بنات أم لعاب).. وأهلها بيحاولو يوروها أنو الشغلة دي مو كدي... يوم زهجت منهم ومن النقة الكتيرة... وشالتو ومشت الحمام.. سمعو الوليد يسرخ... دخلو عليها لقوها في وضعية غريبة وتشيل في الرأس ودايرة تدخل الوليد... لما جو وسألوها قالت ليهم دايرة ارجعو بكان ما جا.... (أها نبقى في زي دا عاد؟)......أقول حقو الجهات المهتمة ..من وزارات.. ومؤسسات...ومنظمات خيرية.... وأطباء.... أن يعملو على تعميم وتشجيع مسعلة إزالة رحم البنات الزي ديل... والمجتمع مليان آلام وأوجاع وما ناقص...ويا ريت الموضوع دا يكون مجاني... ودكاترة النساء والولادة يتبرعو بإجراء العمليات مجاناً... .. لأنو زي دي مسكينة هي براها عبء وألم لأهلها وتمشي تجيب لها زول تاني... ويبقى ليهم في رقبتهم برضو... دا غير نظرة المجتمع للشافع أو الشافعة حتى لو كان جاي من رحم معاقة ذهنياً....وبعدين ممكن جداً تجيب لها أكتر من بطن... يعني تملأ ليهم البيت شُفع.... أو يتفرغ زول في البيت ويقعد يحارسها...لكن إن وقع المكتوب ما منو مفر ممكن تكون في دور تلمهن لكن نحن مافينا زول بيرضى يجدع جناهو حتى لو كان معاق والناس ما بتريحو...... أما عن شريحة الشماشيات.... ديل كمان شغالات ولادة ساااااكت...للمعلومية الشماشة قاعدين يتكاثرو زي الترتيب....ديل مسئولية وزارة الشئون الاجتماعية.... تلمهن وتحفظهن... لكن في بلد زينا نحن الناس العندهم أم وأبو ما عارفين فيهم شي.. خليك لما يكونن بنات شوارع.... وساكنات في الخيران... ومع شماشة ضكور... مراهقين وشباب... وما عارفين العيب حدودو وين...لأنهم أصلاً عايشين برا المجتمع....ممكن يكون عندنا مجمعات تلمهم... وتهتم بيهم والدولة تخليهم ناس يستفاد منهم ويكونو إضافة للمجتمع لا خصماً عليه ... لكن العين بصيرة والايد قصيرة....إن سمعتو نضمي أخير لكم ازيلو الأرحام لكل هؤلاء الفتيات!!!!! (الباب فاتح مُشرع)
