الباب البجيب الريح
بابكر صديق اديتونا السهر.....
بابكر صديق اديتونا السهر.....
يا اخي عشان تعلنو النتيجة.. في حلقة إعلان نتيجة المصعدين للمرحلة التالتة في برنامجكم نجوم الغد.... شارب لي جركانتين موية.. بي جك من الجكوكة الكباااار... أنقِف واشرب.....وانتو تبوظو في أعصابنا.... أنا هين تراني عند أهلي.... لكن حننوني الوليدات والبنيات المقعدنهم ديل.. وكل مرة تقول ليهم بعد شوية ح نعلن النتيجة.... وهم مساكين مشرفين اضنيهم ومقهيين راجين النتيجة... زي ما قلت يا بابكر... إنت وقت عارف كدا؟ المطولات لزومها شنو؟. ريقهم ناشف وانتو كبيبية موية ما بتدوها ليهم... كل مرة تنضمو فوقهم زيييييين وتقول ليهم غنو للوطن.... عليك الله هم خليتو فيهم حيل، يغنو بيهو؟...... لكن مساكين يغنو ووحات الله ايديهم ميتات في الصفقة.... والبيغني فيهم ويرفع اصبعو يا الله ويا امين يرفع اصبعو..... بعد ما خلاص الفينا كملت اعلنتو النتيجة حتين نحن قدرنا نخت راسنا وننوم ..أصلو قناة النيل اللزرق دي.. يوم الخميس بلا الهموم ما عندها لينا شي... نبداها من أفراح أفراح.. عروس زعلانة... عريس مطرم... يشيلنا هم نقول بنية الناس الجنبو دي الله يستر عليها ماتتم الحول ويطلقها الزول ابطراريم دا.... الغريبة العرسان تقول بي ينقوهم، كلهم زعلانين ومطرمين وزي المجبورين علي العرس.. واللا يجيبو لينا ناس... جت ضاربين جفونهم بوهية نشيل هم لما يرجعو أهلهم البوهية دي البتمرقها شنو؟.... وما تقوم تنزل لهم فوق عويناتهم ويعمو. واالا عروس يسو ليها مكياج وما تتعرف للعريس ويقول ما بوقع علي إيصال الاستلام دي ما المرا الكان صفاحي عليها العصر دا.." يا أخوانا طالما فيها تغيّر سحنة زي دي... نرجع للشلوخ.. وكل زول يبقى عارف شلوخ مرتو شنو؟.... لانو الكوفارات قدر ما يكوفرن ما بيقدرن يسون شي في الشلوخ.. يجبن لهن لحم من وين يردمنهن بيهو؟".. و ما ناخد نفسنا من هموم الخميس نصبح على الجمعة..... وبرنامج "مافي مشكلة"... وهي المشكلة بايتة ومقيّلة..... طلاق.. وخصام.... وعيك... واليسمع البرنامج دا يقول ما فضل راجل ومرا في السودان قاعدين مع بعضهم.... الناس جت اطلاقو ونسلنا بقى في درك عظيم.. نشيل هم.... ومرة نغلّط ونلوم الراجل ومرة نغلّط ونلوم المرا.. نهرج ونقول للراجل إنت كمان ما تبقى كدي، إن لقيت فردة نعال من نعلاتك مقلوبة تقول للمرا انتي طلقانة... والمرا نقنق ونقول لها انتي نان قبيل ما سمعتي النضم لي شنو؟.. جاية حسي تشكي؟.. ماكي عارفة النضم الزي دا بجيب الطلاق؟... وينتهي البرنامج ونحن الليل كلو نتقلب فوق العنقريب ونتظكرها... مشكلة.... مشكلة... ونقوم نصقّر في نص العنقريب بعد ما راقدين ونتمحن ونفكر: (يا ربي الجماعة ديل، حسي، سوو كيفن؟...) قفل الباب: دعيني.. أقولكِ ما بين نفسي وبيني.. وما بين أهداب عيني، وعيني.. دعيني.. أقولكِ بالرمز، إن كنتِ لا تثقين بضوء القمر.. دعيني أقولك بالبرق، أو برذاذ المطر.. دعيني أقدّمُ للبحر عنوان عينيكِ.. إن تقبلي دعوتي للسفر..
