غايتو في مرة كدي أنا مما أشوفا داخله علي بيتنا .. طوالي كدي بعرف أنو الموية ح تقطع (بتشاوم منها لله والرسول كدي ) .. عليك أمان الله التقول الماسورة بتخاف منها من تشوفه تعمل نايمة و (خخخخخ) .. قبل كدي شفتو ليكم زول يشرب (بالزير) في ظمتي دي عندها خشم بس (المنقلة) الليلت علبة (الهندسة) وعندها لسان (كدارة) بس . حكمة الله لسانه تحت فوقو (كدايس) .. لكن بالحيل فيها مروة وضكرنة أكتر من الوليدات . النعمنها وكت تقطع الموية تمشي تورد من البحر للحلة كلها (وزيرة الري) . وتبارك الله تحرت مع أبوها في الحواشة هي والتور في خط واحد ... وتجي العصر تلعب مع الوليدات .. أحسن أستوبر مو زيها (داريو كان) وفي داك الأيام والدنيا سخانة .. شدة مو سخانة (نقاط الزير) ما بصل الواطه يكون (يتبخر) .. مره قالو ليها نادي الجنا ده يمش يجيب لينا (عناقريب) لي (الديوان) التقول (ديوان الباشا الكبير) .. وأنا كرهتي في الدنيا المراسيل (الملح ساكت) يعني المرسال وكت مايكون (مطعم) إحتمال أقضاهو وإحتمال (أكبر اللفة وأجي فاضي) وفي واحد كدي إن بتدور منو (سيئة) ما بديك ياها .. ده لو مسكوهو (وزير مالية) إحتمال كبير يحل مشكلة دارفور والجنوب (بالمجاعة) و (القحط) بموتوا لاعن حدهم .
قامت جات العارض دي زاتا ووراها (كتاحة) التقول جات (مفحطة) وأدتني قروش (متين الف بس) حق (العناقريب) وبلغتني الوصية إنو أبوها بدور (4) عناقريب .. وفي معناتو أندرج (الخرتوم) .. قمت غشيت صاحبي زولاً عاقل بالحيل ونجيط في الشراء والبيع قام صاحبنا شافنا (إنعبط) فينا وقال هو (عزال في العناقريب) التقول (بتيخ) !!! .. مارضينا يمش معانا لانو ماعندنا ليهو ميزانية ـ لو سقناهو بياكل تكلفة (عنقريبين).. غايتو (خليناهو يبرطم) ومشينا ...
وصلنا الخرتوم (روحنا دي بتدور تمرق) من السخانة (روسينا ديل إن ما فيهم الطاقية تقول الشعر يدور يتحته) ومشينا علي سوق أم درمان في عشان (العناقريب) ونحن في الطريق واقفين قام وقفت عربية حليونة متل (صفارة الحكم) كدي .. سايقاها بنية تبارك الله هيمة وقيمة لابسة نضارات سود .. وقامت سعلتنا من جيهة السوق الشعبي (ديل ناس عفراء ساي) مو ناس (مقاشيش و عناقريب وسحارات والذي منو) .. طبعاً ياهو زاتو البكان البندورو (رزقاً تكوسو ورزقاً يكوسك) وقلنا ليها نحن زاتو ماشين هناك : أها أصرت إنو نركب معاها .. وعليك أمان الله نحن الإتنين (قلبنا) ده وقع من يدنا (كيفن النسوان كمان يسوقن العربات؟) .. تبارك الله وعندنا واحد لامن يجي يلف دركسون اللوري الليلو لامن يكفكف طرف جلابيته لحدي أباطو ويتعسم في الدركسون متل (قرن التور) الجوهو للضبيحة ... كيفن جنس المناتلة دي يقدرن ليها (البنوت) ؟؟ ... أها غايتو ركبنا وقلنا في خاترنا إنو البنية بتدور ليها مساعدة في الدركسون ترانا (تيران) ساقية ... أها البنية فتحت الحديس وقالت : (Deeply Sorry) يا شباب بس I need your help عاوزه أشتري (بنابر) بتاعة (جرتق) عشان Wedding day بتاع أختي يوم الجمعة .. وبيني وبينكم First Time أمشي السوق الشعبي ده .. وما بعرف اتعامل معاهم كيف ... عليك أمان الله الكلام (شحتفة روح) أنا قلت (الهواء) الفي العربية ده كمل كلو كلو .. ده غير إنو نحن (سجم رمادنا) ما فهمناهو من (اللجيق ده) .. وأنا في اللول قايله بتتكلم في (الموبايل) ... عله أكت عاينت فوقنا عرفت الكلام ده لينا (ونحن مطيرين عينينا) ... صاحبي (إتملا فهم تب) أكت فتح خشمو قال : دي شني دي (The news) ؟؟ دحين صاحبي أطرش لينا قرايتك كلها عند البنية ..
أنا في الوكت في الإنجليزي بعرف جملتين : how old are you والتانية As you like أهان شفت الأولي دي ما بتركب مع الموضوع بتاتاً طوالي قلت أزول أنقطع فيها التانية وقلت ليها : As you like... أكان قالت لي : thank you
في ظمتي الوكت داك قربت أخد لي (عرضة) في العربية إنبسطت إنبساطة وإتفنكهت فنكهة في شان الإجابة الصادفت المعنى دي .... وعاينت في صاحبي عين زول عندو ماجستير في الترجمة .. وقلتلو براحة كدي : أسي اكان جيت إنت و المسنوح داك مو كان شرطو عينا مع (بنوت الخرتوم) .. وعملت إنو أنا جبت الكلام من جوه مصاريني بدراية وحنكة .. وهو مو عارف إنو ده كل الرصيد العندي ويخربني خراب الترب بعدو .. وقمت وأديتو صره زول واثق من نفسو كدي .
بعد شوية قمنا وصلنا السوق الشعبي محل سوق العناقريب زاتو .. ومشينا علي أول دكان وصادف فيهو (العناقريب والبنابر) ونحن مشينا في خاتر البنية في شان نعزل ليها (البنابر) قمنا وقفنا وقفة زول عارف ونجيط وصاحبي يهابش ويعزل ويشوف (سواجة) البنبر ونوع الخشب والبوهية .. وفي ديك الوقفة قام (سيد الدكان) نادى صاحبي على جمبة وقال ليهو : ها زول إنت شكلك زول عروبي نجيط في الشغلة (وجاي تسترزق) .. والبنية دي شكلها مو تبعكم (شن جاب القاورمة لي الشاورمة) دحين أعزل ليها البضاعة السمحة مو مشكلة .. بس علي شرط ما تفاصلني في السعر وليك (عمولة) في كل شيتن تاخدوا البنية ... قام صاحبي إعترف ليهو إنو البنية دي لاقتنا في (دربنا) ساي وجاية تشتري بنابر ونحن جينا في شان نشتري عناقريب .. ووافق هو وصاحب المحل علي السمسرة علي شرط يخفض لينا في (عناقريبنا) كمان ...
أها صاحبي عزل البنابر للبنية ودفعت في تلاتة بنابر 75 الف .. شال 20 الف سمسرة في الوقفة ديك بس وأنا واقف أتلفت .. المهم أشترينا (العناقريب) من نفس المحل .. ومشينا رفعنا البضاعة في الباظ البلد (شحن أرض جوي) في تندة الباظ ...
ووكت جينا نركب الباظ .. أكان الزول (حرن) وقال لي : هازول أرجع البلد وأنا قاعد هنا خلاس .. لقيت لي شغلتن تأكلني الدهب .. دحين ودعتك لي الله وسلم علي ناس البلد
ومن ديك .... هداك .. (محترف في السوق الشعبي ـ عزال عناقريب)
