د. عادل الصادق مكي
( تساؤلات مشروعة حول اشكالية الهوية)
ناس الحكومة مفتكرني معارضة
ناس المعارضة مفتكرني تابع للحكومة
النشالين مفتكرين عندي قروش.......
القروش مفتكراني زهجان منها... عشان كدي ما بتجي علي....
الجماعة تجار العملة ناس ( ريال... دولار... يورو) الفي برندات شارع الجمهورية مفتكرين انا جايي من برا وعندي عملة صعبة...الغريبة ليهم اكتر من خمسة سنوات جارين وراي( يورو..دولار... ريال) مع اني اول مرة اشوف اليورو قبال سنتين وتاني يعميني ما وقع في عيني......
الشحادين لما يشوفوني ماشي يجرو فيني نورطويييييل... وينقنقو... مفتكرني متهجم على مهنتهم
(بنتي الصغيرة تسعة سنوات تراودها احلام اليقظة مفتكراني وزير... وعايشة الدور ( اهو دي اخطر فكرة..مدمرة........
(الشماشة مفتكرني كجر(بوليص
الدكتور وست الشاي.. الاتنين مفتكرين عندي سكري.. الدكتور ان سلمت عليهو سااااكت يقول لي امشي افحص السكري... وست الشاي قبال ما اقنب عديل فوق البنبر تعاين لي بشفقة وتقول لي سكرك كيف؟واللا بدون سكر؟
ناس الحلة مفتكريني فنان بغني... كل مرة يجي واحد يقول لي دايرنك تغني لينا الليلة في حفلتنا... وخايف اتحامق واغني....
(ناس الضرائب مفتكرني زايغ منهم.... اي واحد فيهم يلاقيني يعاين لي من نحت لي فوق... و بقرا في عيونو( الللللليلة... تمشي مني وين
الكمساري في الحافلة لود دفعت ليهو عشرين مرة..برضو يفتكر اني ما داير ادفع ..... يقول لي وهو زعلان وصاري بوزو( يا عمك.... ادينا) وينقنق و يطنطن ويقول( جني وجن الناس البيركبو ملح ديل)
حليمة جارتنا مفتكراني عندي ضهر و واسطة قوية.. كل ما تلاقيني تحلفني بالنبي اتوسط لي ولدا عشان يشتغل....
(علوية جمباز..مفتكرة اُمات طه بيبقو لي.. كل ما اعمل حاجة او اكل حاجة انشا الله بسكويت تقول لي( مخييييير.....بتلحق اُمات طه!
الطماطم في سوق الخضار مفتكراني داير اشتريها....اول ما اجي ماشي جنبها.. وشيها يتقلب احمر من الخجل........
عم ابراهيم رجل في السبعين من عمرو مفتكرني خالو... كل مرة يلاقيني ويستشيرني في موضوع ودائما مقدمتو للنضم( اكبر منك بيوم افهم منك بسنة يا خالي).. وهو يقصد اني اكبر منو..واني خالو بحكم السن.....
عباس سيد الدكان مفتكرني كاتل الجدادة وخامي بيضها.... يعاين في جيبي اليمين كايس للجدادة .. وفي جيبي الشمال كايس للبيض....وبكل ثقة وقوة عين.....
كلبة الجيران... تكون راقدة كويس اول ما اجي ماشي ترفع راسا وتقعد تعاين لي شديد..... يا ربي تكون مفتكراني شنو؟......الله يكضب الشينة!
قفل الباب
لست اخشى من دخان الوَهْم
والسحب العقيمة والجراح
النار حولى و الملاذ الصاخب
المسكون بالموج العنيف و بالرياح
هطلت غيوم الهم اعصارا من القلق المسافر
من حدود الليل ينتظر الصباح
للقاك ارحل فى جحيم الحزن
للرمل الموزع فى ربوع نهارك الممتد
من فرحى لآخر منتهاك
على حدود الصبر والقلق المباح
